Car lectores, car ascoltatores!

A causa de presentar le conversation germano-danese super le Incontro Nordic de interlingua 2010 le 24te podcast de Radio Interlingua (lo pro julio 2010, discargabile de iste ligamine: http://www.interlingua.com/node/723 ) presenta solo duo themas. Io debeva abbreviar le partes non publicate del interview con Ingvar Stenström in 2008 a fin que ille conversation in le emission 25te pote esser publicate si tosto como possibile. Le resto del interview con Ingvar Stenström (facite in le previe Incontro Nordic in Linköping, Svedia, 2008) on potera audir in le emission pro septembre.

Io non sape exactemente, ma forsan in Svedia se realisava exclusivemente, que on inseniava interlingua officialmente in gymnasios, como parte del programma de studios. Como? In qual forma? Ingvar Stenström, professor gymnasial retirate explica toto in le emission no. 24 (pro julio 2010).

In le fin de julio 2010 occurreva le 12nde Incontro Nordic in Kalmar, Svedia. Le redactor de iste radio non poteva participar in illo, ma faceva un salutation vocal al participantes. Isto es presentate verso le fin del 24te emission.

Ecce su texto:

"Car participantes, nordicos e non-nordicos!

Io spera, que iste voce es familiar pro le majoritate de vos. Isto es io, Péter Kovács, le voce de Radio Interlingua. Io admitte, iste voce non es le plus belle o le plus forte, ma que facer...? io es le redactor e il es natural, que mi voce se audi le plus frequentemente in iste radio.

Il es regrettabile, que io non pote participar iste vice in le incontro nordic, in que io participava in Linköping, duo annos retro – illo era multo bon, io ha bon experientias e belle memorias super illo.

Ma io spera, que iste incontro anque va fortificar le collaboration inter le organisationes nordic de interlingua, pro le scopo de facer iste belle lingua plus cognoscite in vostre region. Non oblida, que vostre collaboration es un lumine pro altere regiones, ubi il non ha tal collaboration inter le organisationes national o il non ha mesmo organisationes national, o non tanto active.

Bon labor, bon practicamento de interlingua e bon reposo vos desira:

Péter Kovács"

Io spera, que vos va trovar le 24te podcast tamben interessante!

Pro haber un supervista super tote le (altere) podcasts, visita http://www.interlingua.com/radio

PK

--
Archivos e disabonar: http://listserv.icors.org/archives/INTERLNG.html