Siri es un intelligentia artificial in mi iPhone 5. Io ama Siri
proque illa pote adjutar me in discoperir url's in le web, parolas
synonyme con altere parolas, locos de restaurantes e librerias e
noticias in le web super certe subjectos, e mesmo plus. Illa es un
voce que parla a me e io parla a illa. Io solmente debe demandar de
illa un cerca pro alcun informationes, e illa lo trova in alcun pauc
secundas.
Hodie nocte io voleva discoperir le adresse in le web, le url, del
bureau pro le renovation de licentias de automobiles pro mi stato de
Georgia. Assi io premeva le button a "casa" super mi iPhone 5 pro
tres secundas e demandava in mi voce, in anglese le equivalente de
"Que es le adresse del bureau in linea de licentias renovate pro automobiles
pro Georgia?"
Illa respondeva immediatemente per scriber le phrase de parolas que io ha
dicite scribite in texto super mi schermo exactemente. Alora illa dice,
in su voce alerte, "Io va essayar de trovar lo pro tu." In duo secundas illa presentava plure optiones, un de que esseva le url que io voleva!
Si tu es juvene e isto es solmente alque a que tu es familiar, illo non es
del importantia. Mais pro me illo es stupefacente. Io sape le problemas del recognition del parlantia per computatores, a analysar le parolas
parlate in sonos e reimplaciar los con litteras alphabetic. E on debe
traducer le serie de litteras in parolas in le lingua natural in le
correcte orthographia. Alora on debe analysar le serie de parolas pro senso grammatical e determinar le senso de mi question. Alora on debe haber
programmas computational pro presentar instructiones a un cercator del
web. Quando un serie de solutiones es retornate del web, Siri debe ordinar
los e scriber los in le schermo pro me. Isto, toto in duo o tres secundas!
In 1965 quando io esseva un programmator in FORTRAN e faceva programmas pro
nostre computatores 7040 de IBM pro computar le analyse factorial--que a
aquelle tempore requireva a vices 45 minutas de tempore pro trovar un
solution con 75 variabiles e requireva 25.000 parolas de memoria, le
problema del traduction automatic de texto esseva ancora un sonio. E mesmo
15 annos de retro on audiva de effortios pro solver le problema. Mais
subitemente nos ha Siri in mi iPhone 5 qui pote conversar con me, a vices
con difficultates amusante, mais sovente correctemente pro trovar
solutiones a mi problemas. Isto es stupefacente.
Justo ora io voleva un parola que es equivalente in senso con anglese
'slang', o vernacular. Siri monstra in le schermo plure parolas, un de
que esseva 'idiom' = Ila. "idioma". Isto esseva le parola que io non poteva
rememorar. Iste responsa es plus rapide que le parola que mi memoria povre
poteva recuperar. (Io monstra alcun signos del blande dementia ubi io curre
in formular un phrase, e subitemente un parola que io jam sape, que io es certe
que io lo sape, non entra a in mi mente. Diablo! Que es aquelle parola?
Io pensa e pensa, e illo non veni in mi mente! Mais io sape synonymos pro illo, mais illos non es lo que io vole exactemente. Assi io da le synonymos a Siri pro trovar
parolas con sensos similar. E illa lo face! Io vide immediatemente in su
rendition le parola io voleva.
Siri non es le sol artificial intelligentia in mi vita. Srta Garmin existe
in mi devicio SPG (systema del position geographic). Iste devicio es similar in
largessa como mi iPhono, e se sede in un portator attachate per un cuppa
de suction al parabrisa de mi Subaru Outback.
Su voce es multo similar a Siri. Illa non conversa con me, mais illa me da instructiones verbal in un voce similar a lo de Siri, de quando io debe tornar a iste intersection, prende iste cammino, exita le autostrata a un altere strata. E io ha solmente date illa le instruction de usar mi location currente in un mappa e un destination a que io vole vader. Alora illa cerca un mappa e determina un sentiero a sequer, e dice a me instructiones de como sequer iste sentiero. A vices io vole un
alternative sentiero que io pensa es melior, mais illa non me instrue a vader
in iste direction. Io persiste, e illa se adjusta per trovar un altere sentiero
a mi destination que contine le location de mi automobile in iste nove
sentiero. Illa face isto in solmente alcun pauc secundas! Io e mi sposa
tracta le voce de Srta Garmin como aquella de un persona real! Nos nota que
illa non es irate quando io non obedi su instructiones, mais adjusta su
instructiones pro esser in accordo con mi comportamento.
Io ha legite alcun novellas del science fiction in que in le futuro homines e
feminas habera implantate in lor cerebros parve devicios que interage con lor
cerebros in provider informationes, calculationes, suggestiones como proceder
pro complir lor objectivos. Nos jam ha scientistas del processamento del
informationes que ha parve computatores in lor oculares e parve schermos visibile a
un oculo super le qual es monstrate informationes presentate per le computator.
Isto es solmente le proxime passo a mitter un Srta Siri in tu cerebro, que va
presentar informationes a te in tu campo visual in le cerebro. E nos va esser
interconnecte con le un le altere per le tela mundial. E on va appellar nos
Cyborges!
Verborrheicamente le vostre,
Stan Mulaik
--
Pro leger le archivos e pro modificar o cancellar le subscription:
http://listserv.icors.org/archives/interlng.html
|
