Como appellate vos le romances de homicidios e investigation del policia?
In Italia, nos los appella "jalnos", nomine breve in vice de "romances
jalne". Assi, le scriptor de "jalnos" es appellate "jalnista".

Le publico italian sempre prefereva le stylo europee, p.ex. Agatha
Christie, Simenon, Montalban etc., a illo american. Anque le production
italian es de bon qualitate: si vos non les cognosce, io suggere alcun
nomines, Scerbanenco (morite), Fruttero & Lucentini (un de duo morite),
Camilleri (vivo), Machiavelli (vivo). Desde alcun annos, le lectores
italian discoperiva le "jalnistas" svedese, como - io crede - anque le
lectores de grande parte del mundo.

Isto es un phenomeno editorial que appare clamorose, un ver e proprie
boom al origine del qual es le enorme successo de *Henning Mankell*, le
scriptor svedese plus traducite in le mundo. Ma si le autor del
inquestas del commissario Wallander pote vantar 26 milliones de copias
vendite e traductiones in 35 linguas (non IA, infelicemente), in su
sulco plure connationales sapeva conquirer un placia de vertice sur le
scena del "jalno" contemporanee, como *Leif GW Persson*, *Åsa Larsson*,
le “Regina del jalno scandinave”, le nove astro del jalno nordic *Arne
Dahl*, qui per plus menses esseva prime in Svedia e in Germania, e *John
Ajvide Lindqvist*, definite per le pressa le “Stephen King svedese”.//
Inter le nove discopertas io indica *Stieg Larsson*, cuje "/Millennium
Trilogy"/ esseva acclamate per le critica como "un del melior jalnos
publicate post le IIe guerra mundial", *Kjell Eriksson*, con le
successose serie del inspector Ann Lindell, e *Liza Marklund*.

Forsan le crime nordic attrahe pro le ambientationes suggestive, con
spatios immense, longe hibernos de nive e glacie, un natura aspere in
que se compli horribile delictos. Ma, in ultra, le scriptores svedese
committe a lor romances un forte denunciation social e le officio de
narrar le inquietude de nostre tempore.

(Critica a cura del section litterari del Oculo Interlinguistic)

--
Archivos e disabonar: http://listserv.icors.org/archives/INTERLNG.html