Tres titulos aperi hodie, le 29 de julio 2013, le nove serie con lectura
facile in interlingua que sperabilemente pote facer plus de personas
leger libros in le lingua. Novellas policier, charmante classicos e nove
originales pote desde hodie esser comprate in le nove serie "Facile a
leger in interlingua", que ha essite sub preparation durante longe tempore.
Adjuta le diffusion de interlingua per comprar e recommendar le nove
serie, que va crescer tosto. Plure nove titulos es sub preparation e va
apparer durante le veniente menses. Diffunde le nova per omne canales de
information (Facebook, Twitter, listas de correspondentia, amicos,
familia etc.), assi que le plus grande numero de personas lo sape.
Omne parolas usate in le textos, e que non se trova in "Interlingua -
dictionario basic" (per Thomas Breinstrup e Italo Notarstefano, Union
Mundial pro Interlingua, 2011), es explicate in interlingua in notas de
pede.
Le tres prime titulos es:
"Litteras de mi molino" (32 pp. A5, precio: 5 euros) es un collection de
breve historias scribite per Alphonse Daudet (1840-1897) super le vita
in su ancian molino in le sud de Francia. Iste libro contine quatro
historias: "Le capra de Sr. Seguin", "Le morte del Dauphin", "Le curato
de Cucugnan" e "Le secreto de maestro Cornille".
"Le homicidios in le Rue Morgue" (44 pp. A5, precio: 6 euros) es un
collection de quatro del Contos obscur per le autor Edgar Allan Poe
(1809-1849): "Le homicidios in le Rue Morgue", "Metzengerstein", "Le
barril de Amontillado" e "Le masca del Morte Rubie" - omnes es contos
que va facer le capillos levar se. "Le homicidios in le Rue Morgue" es
considerate le prime novella policier in le mundo.
Le natura face le 12 menses del anno multo differente. Cata mense ha un
charme typic. Iste libro "Le anno - 12 menses in photos e parolas" (20
pp. A4 con spiral, precio: 10 euros) seque le cambios durante un anno --
in photos e parolas. Lege le parolas que presenta le mense con
observationes personal e factos, reguarda le multe belle photos, e gaude
de vider, como le anno cambia mense post mense. Le libro in formato A4
es con un spiral practic pro facilitar le lectura.
Visita http://www.interlingua.com/official/2013-07-29-facilealeger pro
saper plus. Il ha anque un pagina special pro "Facile a leger in
interlingua": www.interlingua.com/facilealeger (trovabile sub le menu
"Libros e litteratura").
Gratias pro tu supporto - e bon successo con "Facile a leger in
interlingua"!
Con mi optime salutes
Thomas Breinstrup
--
Pro leger le archivos e pro modificar o cancellar le subscription:
http://listserv.icors.org/archives/interlng.html
|
