Car Jerzy,

        Io ha 74 (septanta quatro) annos de etate e interlingua es mi "passion de hiberno". Pauco minus que duo menses retro io ha discoperite iste belle lingua international al Internet e desde alora non pote non studiar lo multe horas cata die. Io es pensionate (io travaliava durante 30 annos al Banco do Brasil) e dispone de assatis tempore pro mi  *hobby* (passatempore) favorite: studiar linguas estranier. Io lege aliquanto ben le anglese, le francese e forsan anque le italiano; naturalmente, tamben le espaniol, lingua soror del portugese. Io ha studiate ante alicun annos le esperanto, anque un pauco le germano e le russo, ultra le latino e rudimentos del greco. Non pensa tu, totevia, que io vole dar a intender que io es un linguista, ma simplemente monstrar te que pro me il es facile, autodidacticamente, apprender interlingua, maxime si on sape que mi lingua materne es le portugese, un del linguas fontes (juncte con le espaniol) de ia.
        
        Il me placerea multo poter adjutar te apprender interlingua, mesmo a si grande distantia.

        Qual cosas habe io facite usque ora in mi effortios pro attinger un bon nivello in este meraviliose lingua auxiliar?

        PRIMO - LE GRAMMATICA
        
        Ad alicun personas il non place studiar questiones grammatical, ma isto es vermente indispensabile, proque le grammatica "describe le structura de un lingua" e, del resto, le grammatica de interlingua es sin dubita multo simple o simplificate. Assi, mi prime passo esseva "imprimer" mi grammatica, ab le sito http://www.interlingua.com/node/
ubi, ab le prime paragraphos, re orthographia e pronunciation (http://www.interlingua.com/node/64)  
usque al "Lista de particulas grammatic" (http://www.interlingua.com/node/113)
es presentate le regulas principal que on necessita pro maestrar interlingua.  Postea es exponite altere themas (derivation, prefixos, suffixos, composition, etc.), le quales tu potera studiar sin haste.

        Isto dicite, io va attender tu reaction a iste e-posta, promittente proceder con mi inpretentiose consilios, si tu los desira. Interlingua me ha integremente conquirite e io gaude multissimo de veder que, pro exemplo, in Polonia alicuno como tu se interessa in apprender lo tanto como io aqui in Brasil.

Amicalmente,

Carlos Alberto Santos
Aracaju - BRASIL

--
Archivos e disabonar: http://listserv.icors.org/archives/INTERLNG.html