Car amicos,
Gratias a vos qui ha reagite a mi messages recente.
Il me pare utile que io vos informa de mi attitude como
lexicographo. Iste information explica certemente multo de
lo que io face e de lo que io non face.
Io crede que il existe in principio duo attitudes de un lexicographo
de interlingua. Illo de un novator qui submitte le material existente
(le dictionarios, textos, etc.) a un controlo critic e qui, postea,
(e isto le characterisa como novator) adapta iste material
a su proprie gusto personal, removente certe vocabulos e
cambiante le formas de altere vocabulos.
Le secunde attitude es illo de un registrator, un persona qui
non solmente con un oculo critic reguarda su materialo, ma qui,
corrigente errores evidente, registra lo que ille ha trovate.
Ben que a vices io, in mi rolo de lexicographo, es inclinate
a cambiar cosas secundo mi proprie preferentias, io subprime
semper o al minus quasi semper iste inclination.
In facto io es un registrator, qui registra dunque lo que ille ha trovate.
Ma in duo casos io devia de iste principio:
1. Io non registra cata novitate, que un individuo o alcun individuos
lancea in su/lor messages in INTERLNG.
2. Iste secunde caso concerne le constatation que il ha vocabulos
basic in le IED, que nemo, o quasi nemo, usa. Alora io es
fortemente inclinate a non acceptar los in le nove editiones
de mi dictionarios. Jam in le prime editiones de illos (1992)
vos non plus trova decenas de vocabulos imprimite in le IED
inter parentheses quadrate, ma que nemo usa. Illos non functiona,
illos non vive! Proque haber vocabulos como "permulte" e
"permulto" in un dictionario de interlingua, si lor sensos pote
facilemente esser exprimite per "multissime" e "multissimo"?
Nunc un remarca super le nove vocabulos que io ha registrate
in mi dictionarios.
Io ha potite trovar iste milles de vocabulos sequente le prescriptos
que Gode da in le introduction del IED.
Ma naturalmente il es possibile que in certe casos io ha errate.
Il va sin dicer que io esserea grate al personas qui me signala tal
errores.
Salutes de Piet Cleij
--
Archivos e disabonar: http://listserv.icors.org/archives/INTERLNG.html
|