In re le texto in italiano debattite per Jo e Kjell, io opina que isto es un
bon momento pro disserer del rolo que un lingua auxiliar (sperabilmente
Interlingua) debe o pote haber.

Primemente, io debe exponer in Interlingua le scenario de fundo (= anglese
"background") del texto divulgate per Jo. Vole ben notar que io essayara de
exponer solmente le factos objective, e pete excusas pro mi eventual errores
de interpretation.

Le Radicales italian es un gruppo de parve e parvissime organisationes politic
confederate, de orientation libertari, non-violente e ecologiste. Forsan alcun
de vos cognosce "Que necun tocca Cain", que se batte pro le abolition del pena
de morte; un altere de iste organisationes es "Association Radical Esperanto",
active in Rete con le sito www.linguainternazionale.it

Le Radicales es plus active a nivello international que italian, e ha bon
experientia de debattos in lingua anglese: un de lor maxime representante,
Emma Bonino, esseva commissario europee pro le derectos human pro plure annos.
Le Radicales es note pro esser philo-Israel, philo-USA, philo-UK, e non pote
esser accusate de esser contra le cultura anglese.

In le 21 octobre passate, le Association Radical Esperanto lanceava un
campania intitulate "Facer apprender un lingua anque al angleses", basate
super le these subsequente:

"Dum nos (non-anglophone, nota de robocap) es costringite a apprender le
anglese desde le sex annos, le anglophonos native non ha alcun obligation e in
general non studia alcun lingua estranie. Isto es un grave discrimination,
tanto plus grave si on considera le avantages enorme que le Paises
non-anglophone concede a illos de lingua anglese native:

1. un grande mercato (cursos de anglese, material didactic, traductiones,
etc.) es concedite  al citatanos del Paises anglophone;

2. le anglophonos native non debe numquam investir tempore o moneta pro
apprender altere linguas, e isto se traduce in un multo grande economisation
in costos de instruction public pro lor Paises (le economista suisse Grin
valuta que isto face sparniar al instruction public de USA circa 16 miliardos
de $ per anno);

3. anque si le non-anglophonos face grande effortios pro apprender le anglese,
illes quasi numquam succede in attinger le paritate con le anglophonos native:
a) paritate in le comprension, b) paritate quando on parla in debatto public,
c) paritate in le negotiationes e in le conflictos verbal.

4. jam hodie in Europa nos ha un discrimination in le ingagiamentos de labor
inter citatanos europee anglophone native e non. De facto, a nivello europee
il ha centenas de annuncios classificate que offere empleo con le requisito
"English mother tongue".
Isto occurre etiam per organisationes europee financiate per tote le citatanos
europee."
(io ha resumite le texto original, n.d.r.)

Le campania radical se compone de 8 initiativas de promotion del Esperanto in
le scholas, le Universitates e le Scouts.

Io invita omnes a exponer su opiniones super iste subjecto, naturalmente con
considerar le rolo de Interlingua in vice de Esperanto. Anque io va exponer mi
opinion in altere messages.

robocap



---
Le posta in exito es certficate exempte de virus
Outgoing mail is certified Virus Free.
Checked by AVG anti-virus system (http://www.grisoft.com).
Version: 6.0.788 / Virus Database: 533 - Release Date: 01-11-2004