Car amicos e compatriotas,

            Habitante depost pauc tempore (minus que tres menses) le communitate, le sphera, le mundo de Interlingua, io constata in illo un grave mancantia, un inacceptabile absentia. Il ha manco de FEMINAS in le movimento pro nostre amate lingua auxiliar international! E isto me pare tanto plus surprendente post que Interlingua debe su existentia a un femina (ALICE VANDERBILT) e le actual presidente del UMI es un femina, seniora BARBARA RUBINSTEIN.

            Il es ver que on pote dicer que anque le presidente del Union Interlinguista de Francia (UIF) es un femina, le venerabile dr. JEANNE MARTINET, semiotico e linguista eminente; e que Svedia habe un lexicographo del expression de seniora PIAN BOALT; e mesmo que in le Conferentias International de Interlingua on pote eventualmente vider e audir un conferencista de tal excellentia como PAVLINKA MANOLOVA, de Bulgaria... Mais, io considera que isto non suffice. A mi aviso, le movimento besonia, necessita, exige un presentia feminin multo major, numericamente -- qualitativemente, nos non ha de que planger nos --, pro que se pote diluer un pauco iste "pesante" atmosphera masculinisate :-) que on respira in tote le ambientes interlinguista.

            Le ideas, le attitudes, le sensibilitate feminin me sembla indispensabile a vigorar iste *movimento* (que on me pardona) quasi stagnate. On vole vider in action perceptibile e mesurabile le MARITAS, le FILIAS, le SORORES, le AMICAS, le COLLEGAS (illas) del interlinguistas, como nove interlinguistas. Que illas pote adder su intelligentia, su enthusiasmo e, pro que non?, su gratia e su charme al effortios del viros devotate a mantener vive le flamma de iste ideal si nobile e si utile al humanitate -- le practica international de un lingua auxiliar neutre (e si apte e si belle como nostre Interlingua).

            Assi, io veni precar vos de seriosemente discuter iste idea, a fin que on discoperi e implementa le mechanismos le plus efficace pro attraher le FEMINAS in tote le mundo al communitate interlinguista. On ha urgente besonio de un projecto de marketing con tal scopo: FEMINAS PRO INTERLINGUA JA!

            Cordial e sperantiosemente,

Carlos Alberto Santos
Aracaju - BRASIL

--
Archivos e disabonar: http://listserv.icors.org/archives/INTERLNG.html