d[080311] x[Kiviaho Allan] z[KivA-H3Asm]
s[Kosova - Kosovo?]
[log in to unmask]
Estimate interlinguistas!
Durante 2008-02-15--27 io habeva un divertimento
dubitose de jacer in hospital in 13 dies e 12 noctes.
Le grande majoritate de patientes in nostre sector era
multo malade.
Totevia, il habeva un exception brillante ... oh
no ..., non io sed un juvene kosovaro, qui habeva
habitate in Finlandia jam desde 16 annos.
Nos habeva discussiones interessante in noctes. Como
cognite, le 2008-02-17 Kosova se declarava un stato
independente.
In un jornal finlandese il sta que "solmente un nomine
es mentionate in le declaration official de
independentia de Kosova, sed illo octo vices. Ille
nomine es illo de Martti Ahtisaari, ex-presidente del
Republica Finlandese e le architecto del independentia
de Kosova."
Nonobstante, Finlandia non recognosceva le
independentia de Kosova immediatemente. La recente
presidente de Finlandia, sra Tarja Halonen, annunciava
que Finlandia va lo facer sed solmente plus tarde
"proque illa era occupate per viages estranier". Le
ver motivo era verisimilemente a sparniar le
sentimentos de russos e serbos. Finlandia recognosceva
Kosova como 27e stato le 2007-03-07. Sr Ilkka Kanerva,
le ministro de affaires estranier finlandese, perdeva
le lettera de recognoscentia pro un momento in le
chaos de su papiros e lo trovava solmente durante le
conferentia de pressa de sr Matti Vanhanen, le prime
ministro finlandese. Ilkka Kanerva, 63 annos, ha
levate supercilios mesmo al estraniero con su
messagios per mobiltelephono a un juvene stella de
strip-tease finlandese, durante que ille era a un
visita statal in Caucasia (Georgia, Armenia,
Azerbajdzhan). Un jornal finlandese mantene que le
quantitate de iste messages sexy era ca. 200 durante 3
dies ...!
----------------
KOSOVA o KOSOVO?
----------------
Io demandava le juvene kosovaro in le hospital si le
nomine official de Kosova es Kosova (forma albanese) o
Kosovo (forma serbe). Ille respondeva
determinatemente: "Absolutemente Kosova!". Io
demandava de ille etiam si on pote nominar lo etiam
Kosovo. "Absolutemente non!", ille respondava.
Il es ver que Kosova es un vetule territorio
serbe - benque le albaneses/shqipetaros ha
probabilemente habitate illac plus longe. Hodie ca.
90 % del population de Kosova son albaneses musulman.
Kosovo polje (Campo de merlas) es un placio sacre pro
serbos. Ibi habeva loco in 1389 un grande battalia
inter le armeas turc sub sultan Murad-i Hüdavendigar e
le tzar serb Lazar. Le turcos se emergeva victoriose,
sed le ambe soveranos cadeva.
Post iste battalia Serbia debeva pagar tributos a
turcos. Sed Serbia ancora non era finalmente perdite.
In 1444 sultan Ikinci Murad Han batteva un armea
christian combinate sub Vladislav Varnenczik (rege
polonese) a Varna, Bulgaria (io ha duo vices visitate
le campo de battalia e le museo in Varna).
In 1448 habeva loco LE SECUNDE BATTALIA DE KOSOVO
POLJE. Sultan Ikinci Murad Han batteva le armea del
coalition catholic que battaliava sub commando de
Janos Hunyadi, regente del Regno de Hungaria. In
1453 Fatih Sultan Mehmed capturava Constantinopole
(Istanbul) e in 1459 Serbia cadeva finalmente (i.e.
pro plus quam 4 seculos) sub dominion turc.
Kosovo polje es un loco memorabile pro le serbos
ancora pro un TERTIE GRANDE BATTALIA. Illo occurreva
in le prime guerra mundial in 1915, quando le armea
serb luctava su grande battalia desperate contra le
armeas german, austro-hungare e bulgare, que attaccava
con grande superioritate. In le libros de historia de
statos del Entente Cordial (Britannia, Francia etc.)
le rolo de Serbia es presentate como un grande saga
heroic.
Mi position in iste disputa es delicate. Io, pro
exemplo, multo admira le musica folkloristic serb e
nos era in 1983 multissimo cordialmente recepte in
Beograd quando nos jocava chacos contra le equipa de
"Crvena Zvezda" (Stella Rubie) in le Cuppa de Europa.
Heh, io perdeva contra le granmaestro Knezhevic, sed
jocava un remis contra granmaestro Janosevic, qui
habeva vincite super duo campiones mundial, Robert
Fischer e Mihail Tal ...
Sed io opina que si un nation face 90 % del population
in su pais, illo absolutemente merita un independentia
e soveranitate total. Nos arrivava a Alanya, Turchia,
in le ver die quando le truppas de OTAN startava su
contra-attacco contra le serbos qui occupava Kosova.
Multe paises non vole recognoscer le stato de Kosova,
inter illos Espania, que time le aspirationes
separatista de bascos.
A proposito, io prefere le nomine KosovA, proque illo
es supportate per plus quam 90 % del population de
iste pais e illo causa nulle problemas in ulle linguas
europee. Le serbos e etiam le serbos kosovar va
probabilemente continuar a usar le nomine KosovO.
In nocte in hospital nos reguardava in TV quando le
kosovares in Finlandia celebrava le independentia. Il
es ridicule que le "communitate international" preveni
kosovares de usar lor symbolo national, un aquila
nigre, in lor bandiera.
Un incidento multo peculiar
---------------------------
Durante le die del independentia de Kosova un grande
grege de merlas ("koses") se colligeva circum nostre
hospital. Il era le prime vice io videva un grande
grege de iste aves, illos era obviemente aves
migratori que habeva arrivate in nostre pais in bon
tempore, proque iste hiberno ha essite le plus calide
in le historia moderne de Finlandia.
Salutante
Allan Kiviaho
--
Archivos e disabonar: http://listserv.icors.org/archives/INTERLNG.html
|
