d[070603] x[Kiviaho Allan] z[KivA-G63ik]
s[Re: Piet Cleij 80 annos]

[log in to unmask]

Gratias, Carlos Alberto (Brasil) e Charles Benson
(Francia) pro vostre messages amical!

In mi message KivA-G62gg io manteneva que professor
emeritus Leland B. Yeager era le PRIME presidente del
UMI. Io intendeva "PREVIE". De facto, si io es
informate correcto, prof. Yeager era le SECUNDE
presidente del UMI (post le morte de Alexander Gode in
1970 le UMI non habeva un presidente sed le plus alte
functionario era secretario general).
Interessantemente, prof. Yeager ha nascite in le mesme
anno (1924) que le IALA!

De facto ille era le TERTIE presidente del UMI:
1. Alexander Gode-von Aesch, Statos Unite 1955-1970
2. Leland B. Yeager, Statos Unite         1993-1999
3. Jesper Olsson, Svedia                  1999-2001
4. Barbara Rubinstein, Svedia             2001-

Le empleo del secretario general del UMI ha essite e
es un position importante. Possessores de illo ha
essite i.a.:

Alexander Gode, Statos Unite (temporari) 1966
...?
Karel Wilgenhof, Pais Basse       (AAAA?)-1972-1982
Frank Esterhill, Statos Unite             1982-1989
Ferenc Jeszenszky, Hungaria, (temporari)  1989-1991
Piet Cleij, Pais Basse                    1991-2005
Petio Angelov, Bulgaria                   2006-

Un pauc paradoxalmente [*] Le Statos Unite de America
ha jocate un parte importante, si non decisive, in le
historia de interlingua. Le lista de personas in le
direction del IALA ancora in le 1950s ha essite
vermente imposante. Vide
http://www.interlingua.fi/iedprefx.htm
http://www.interlingua.fi/iedprefa.htm
http://www.interlingua.fi/iedprefo.htm
http://www.interlingua.fi/iedprefw.htm

[*] Paradoxalmente proque hodie le Statos Unite es un
pais ultra-chauvinista, que pensa que le anglese es le
optime lingua que debe esser parlate in tote le mundo.
Vide
http://www.interlingua.fi/eusynerg.htm

Es illustrative que Frank Esterhill, qui era longe un
interlinguista enthusiastic e qui maestrava
interlingua excellentemente, subito in un die deveniva
un anti-interlinguista furiose. Ille comenciava
scriber solmente in anglese defendente anglese contra
interlingua. Ille attaccava interlinguistas usante le
plus fede parolas trovabile in le lingua respectuose
de Shakespeare ...

---------------------------------------------------------------
Benson Charles 070602: Le interlingua pote esser potente
vehiculo pro le cultura e le pensata sed io dubita que illo
pote esser lingua intermedie que adoptarea le institutiones
official tal que EU e NU [*].
------------------------------------------------------|--------

Mi opinion es que qualcunque pote esser possibile,
como le historia ha tanto multe vices provate. Grande
movimentos successose ha sovente nascite per effortios
de parve gruppos de enthusiastas.

Si alicunos considera le lucta pro interlingua un
lucta quijotic, io cita le parolas de ex-presidente
del Statos Unite, Lyndon B. Johnson (secundo le
caricatura in un magazin statounitese con pictura ubi
sr Johnson sede in un bombator B-52, referente le
bombardementos in Vietnam):
- - -
"It's better to have bombed and failed than not having
bombed at all!"
[Il es melio de haber bombardate e fallite quam non
haber bombardate del toto]

Io era multo imponite de slogan pro interlingua de
juvene bulgaros in le conferentia international del
UMI in Focsani, Romania, in le anno 1999:
----------------------------------------------------
N O S  C R E D E , N O S  V O L E , N O S  P O T E !
----------------------------------------------------
Manifestation de gruppo juvene ex Bulgaria:
Elitsa Ivanova, Maria Atanassova, Sabina Zafirova,
Mirena Cherneva, Konstantin Katsev, Naiden Iotov e
Nikola Seimenov

[*] Io non multo crede que interlingua vaderea devenir
un lingua commun in le "Nationes Unite" (= in tote le
mundo), proque le onere de peccatos de europeos como
colonisatores es nimis pesante.

Sed un singule lingua commun PRO COSAS PRACTIC es
absolutemente necessari pro le Union Europee. Sin illo
synergia europee de gente (franchitia), ideas,
scientias, technica, material, mercatos, moneta etc.
non esserea possibile.
E il pare haber solmente duo alternativas: Le anglese
o interlingua.
Io selige INTERLINGUA!

Interlingua esserea un bon alternative etiam in le
Americas, ubi omne grande linguas son linguas fontal
de interlingua. Con interlingua como lingua commun on
poterea evitar le rivalitate inter le espaniol
(castiliano) e portugese. Sed io time que le
influentia e poter del Statos Unite e anglese es nimis
devastante in le hemispherio occidental. De altere
latere forsan il esserea un melior solution mesmo pro
le Statos Unite si illo haberea un lingua commun pro
le cosas practic in loco de duo (anglese e espaniol).

Interlingua como singule lingua pro cosas practic in
tote le America e in tote le Europa e altere partes
in le mundo (Africa, Asia-Oceania) ubi on parla un
lingua romance o anglese esserea un beneficio forte
in le concurrentia con le nove superpotentias asiatic
in nostre mundo globalisate.

Vide mi concepto pro interlingua in le
ALCA-FTAA-ZLEA - Area de Libere Commercio del Americas
http://www.interlingua.fi/aa_alca.htm

##########################
PIET CLEIJ COMO BICYCLISTA
##########################

Piet Cleij es un grande enthusiasta de bicyclismo.
Como io, mi sposa e le familia de nostre filio
(includente nostre granfilio Morten "Fyffe", 4 annos,
e Lina Matilda "Fyffelina La Napolitana", 1 anno e
1 mense). La piccolo Napolitana faceva su prime longe
viage al sede de infantes del bicyclo de su granpatre,
io, 71 annos.

Io spera que etiam Piet, con su 9 annos plus, ancora
es capabile a facer longe e refrescante viages de
bicyclo in uno de paradises del bicyclismo, le Pais
Basse.

Etiam in le area de Helsinki nos ha un magnific rete
de vias de bicyclos.

Mi patre, qui viveva in 1878-1952, era un bicyclista
fanatic. Vide
http://www.interlingua.fi/kiva/haanedoc.htm#bicyclo
Le photo es prendite in le anno 1899.
Ille considerava que le bicyclo es le sol human medio
technic pro viagiar. Ille bicyclava usque su
morte - ille era fortiate a illo, proque durante le
guerras 1939-1945 e etiam multe annos post illo il
habeva quasi nulle autos in le provincia - illos era
confiscate al  f r o n t e . Mesmo io comenciava usar
bicyclo (un vetule e multo pesante bicyclo de
viros - mi patre usava un elegante bicyclo de feminas,
un famose modello svedese, "Crescent") in etate de 6
annos in anno 1942.

#############
F R O N T E !
#############

Io ha habite le gaudio a incontrar Piet in multe
conferentias international e nordic de interlingua.
Durante un de iste conferentias Piet narrava un
incidento multo traumatic ex le guerra. Como cognite
le Pais Basse era occupate per Germania durante
1940-1944 (alicun partes usque 1945?). Ille habeva 16
annos in 1943 quando ille remava con su amico al mar.
Un patrulio german appareva e controlava lor
documentos. Le amico de Piet habeva 17 annos e pro
isto ille era arquebusate proque ille non habeva
inregistrate se in le files german pro eventual
transportation al labor fortiate in Germania.

In Finlandia nostre relation con Germania era
differente. Germania (plus o minus) salvava Finlandia
in 1918 durante nostre guerra de liberation contra
Russia (e, infortunamente, le sanguinose guerra civil
inter le "blancos" e "rubies"). In le Guerra Hibernal
1939-40 Finlandia luctava solo contra le Union
Sovietic, con le qual Germania era alliate (le Pacto
de Molotov-Ribbentrop). Finlandia era miraculosemente
salvate post le battalias de 105 dies sed Stalin
voleva facer le coup de grâce. In iste circumstantias
Finlandia se alliava con Germania e attaccava le Union
Sovietic in 1941. Le armea finlandese reoccupava le
territorios que Finlandia habeva perdite in le Guerra
Hibernal e grande areas mesmo in le Union Sovietic.
Como cognite le armea sovietic emergeva como victor in
le guerra. In junio 1944 le armea sovietic tentava
annihilar Finlandia in un attacco gigantic. De novo
nos era - miraculosemente - salvate. In iste miraculo
le germanos jocava de novo un rolo importante.
Finlandia era salvate - Helsinki era le sol capital
de alliatos de Germania que non era occupate in le
secunde guerra mundial. Sed post le armistitio nos
era fortiate facer guerra contra nostre alliato,
Germania (50 000 finnos contra 210 000 germanos con
fortia aeree superior) in Lapponia. Lapponia era
quasi totalmente destruite.

Durante le guerra io habeva vidite germanos solmente
(forsan un vice), un officiero qui visitava nostre
municipalitate (Alavus). Sed in 1944 on rumorava que
un german treno militar era al station ferroviari de
Alavus (4 kilometros al nord de nos). Nos pueros
hastava nos al station. Alicun soldatos finlandese
stava al guarda - pro tener 1000 soldatos del
Wehrmacht in le treno ... Nos pueros portava limonada
a soldatos german pro alicun pennis de moneta. Io era
choccate proque le soldatos german era bastante
hostile contra nos infantes - illes faceva jocos
malvolente con nos. Io non plnmente comprendeva que
illes era nunc inimicos con nos - traitores - benque
le operationes militar inter nos non ancora habeva
comenciate. Io era quasi ancora plus choccate quando
io in 1945 incontrava soldatos russe in Helsinki,
que pertineva al parve gruppo de soldatos que le Union
Sovietic habeva inviate a Finlandia pro proteger le
Commission de Controlo sovietic-britannic, de chef
del qual era general-colonnello Andrej Zhdanov, un
timite "executor de parve nationes", como Estonia. Le
soldatos russe qui io incontrava in le cafateria de mi
matre era extrememente amical ... E io habeva audite
e legite propaganda de horror anti-russe durante le
ultime plus quam 5 annos ...

================
Dr Seyss-Inquart
================

Io es un membro del direction del Union Paneuropee
Finlandese (le presidente del Union Paneuropee
International es sr Alain Terrenoire, Francia e
ex-presidente Chirac es le presidente honorari del
Union Paneuropee Francese).

Le fundator e le prime presidente del Union Paneuropee
era conte Richard Coudenhove-Kalergi. Su stato major
era in luxuriose, mesmo magnific, salas in le Palatio
Imperial (Hofburg) in Vienna. Ille era in summitate
del lista de personas qui debeva esser liquidate
durante le "Anschluss" (annexation de Austria per
Germania). Post aventuras improbabile ille poteva
escappar a Suissa via Czechoslovakia, Hungaria,
Yugoslavia e Italia. Le chef del Austria nazista,
"Ostmark", se domiciliava a salas del Union Paneuropee
e dr Goebbels ordinava que un parte del bibliotheca e
archivos del Union Paneuropee debeva esser destruite e
le resto inviate a Berlin.

Ab Berlin le invincibile armea rubie transportava le
archivo del Union Paneuropee a Moskva. Ab illo iste
archivos ha essite inviate (originales o microfilms?)
al
INSTITUTE DE UNIVERSITATE EUROPEE - ARCHIVOS
HISTORIC DEL COMMUNITATES EUROPEE, Firenze, Italia
Vide
http://www.interlingua.fi/upeu/upeuarch.htm

--------------------------
Seyss-Inquart e Piet Cleij
--------------------------

Piet Cleij sape solmente nimis ben qui era dr
Seyss-Inquart. Ille era nominate le Generalguvernör
(Governator general) de Pais Basse. Pro su meritos in
Pais Basse ille era affurcate in Nürnberg in 1946.

--------------------------------------------------
Coudenhove-Kalergi & Duggan & Constitution Europee
--------------------------------------------------

Coudenhove-Kalergi era le prime laureator del Precio
de Carolo Magne e dr Javier Solana Madriaga le ultime.
Vide
http://www.interlingua.fi/premcaro.htm

Javier Solana esserea le official ministro (o
commissario) de affaires estranier official del Union
Europee, si le Constitution Europee haberea essite
ratificate.

Le prime Constitution Europee, vide:
http://www.interlingua.fi/upeu/upgecons.htm
http://www.interlingua.fi/ramstegj.htm (Sadri Maksudi!)

! ! ! ! ! ! ! ! ! ! ! ! ! ! ! ! ! ! ! ! ! ! ! ! !
Coudenhove-Kalergi e Stephen P. Duggan (le ultime
presidente del IALA) era amicos e collaboratores
proxime!
http://www.interlingua.fi/iedprefx.htm#duggan
http://www.interlingua.fi/iafiupa.htm#P25B
! ! ! ! ! ! ! ! ! ! ! ! ! ! ! ! ! ! ! ! ! ! ! ! !

Un subjecto interessante esserea a recercar in le
archivos del IALA (New York) e illos del Union
Paneuropee (Firenze), si in le correspondentia
eventual inter Coudenhove-Kalergi e Duggan
interlingua (o panlinguas in general) ha essite
mentionate. Il es cognite que le esperantistas e
occidentalistas faceva propaganda a Coudenhove-Kalergi
e le libro fundamental "Pan-Europa" es traducte in
esperanto, occidental e - finnese! Io ha le honor de
haber le edition finnese signate per archiduce Otto
von Habsburg, le secunde presidente del Union Europee
e le filio del ultime regente imperator de
Austria-Hungaria. Ille es ancora un paneuropeo active
in etate de 95 annos!

- - -

In iste signos, avante!

Allan Kiviaho

--
Archivos e disabonar: http://listserv.icors.org/archives/INTERLNG.html