>
>Date: Sat, 31 Jan 2004 00:48:29 +0100
>From: Loeiz <[log in to unmask]>
>Subject: Nove in iste foro
>
>Salute a omnes,
>
>Io es un nove interlinguista/interlinguaphono/interlinguano(?),
>apprendente interlingua desde Julio. Permitte me presentar me
>brevemente. Mi pronomine es Loeiz. Mi lingua materne es le
>francese. Io es de profession "educator specialisate" (on dice
>in altere paises psycho- o socio-educator, o psychopedagogo),
>ma ha studiate previemente le litteras francese in le
>Universitate : linguistica e grammatica, ancian francese e su
>formation, latino classic, inter altere disciplinas. Io labora
>con personas estranier qui demanda le asylo politic in Francia
>(isto es secundo le Convention de Geneva).
>
>Interlingua es le prime lingua auxiliar que io apprende. Io lo
>ha discoperite super le interrete per cercar informationes re
>le Latino Sine Flexione de Peano, super que io habeva legite
>alique plure annos retro... le nomine "interlingua" me ha
>ducite a hic!
>__________
>
>Sin lancear un nove discussion super subjectos linguistic
>(pardono a Jollino!), lo que io ama in interlingua es le
>possibilitates creative que illo offere per le ricchessa de su
>vocabulario, que permitte obtener varie nivellos de lingua
>secundo le scopo visate. In mi opinion, tal nivellos es
>possibile per le existentia de pares de vocabulos de origine
>latinesc (le vocabulario "docte") e popular (ex le latino
>vulgar o le linguas germanic). Pro exemplo, le phrase "io ha
>pavor de caballos de guerra" es (sempre secundo me) minus
>litterari que "ego time equos de bello". Nonne?
>
>Sed io crede que un tal libertate es possibile solmente si on
>respecta interlingua como illo he essite elaborate par IALA,
>con su objectivo de internationalitate in le vocabulario e in
>le grammatica, mesmo si unes pote criticar su regulas... Io me
>arresta hic, o io deberea ir al coollist!
>
>
>Como le prime utilisatores de INTERLNG soleva scriber al fin de
>lor messages:
>>>>CORRECTIONES/SUGGESTIONES BENVENITE<<<
>
>Amicalmente,
>
>Loeiz.
Ben venite, Loeiz, a interling. Es tu profession lo que nos
dice in america aquello de un 'educational psychologist'?
Io es un psychologo, professor, statistico pensionate del
Instituto Georgia del Technologia in Atlanta, GA. Mais io
ha habite un interesse in interlingua desde 1954 quando io
ha discoperite lo in un periodico Science News Letter, ubi
Dr. Gode ha scribite summarios de articulos del mense in
interlingua. Io habeva le bon fortuna de cognoscer Dr. Gode.
Ille ha visitate mi casa in Salt Lake Citate, alora ille ha
invitate me a restar a su casa durante que io cercava pro
un location quando io visitava Nove York pro sex menses in
1961. Io ha trovate lo al hospital ubi io esseva un practicante
temporari del psychologia clinic. Io esseva un practicante in
le Hospital de Veteranos (del Guerras) in Brooklyn. Io
frequentemente ha visitate su bureau a 80 East 11th Street
in Manhattan. A la io ha trovate Dr. Gode preoccupate con
traducer summarios e articulos medic e scientific in
interlingua. Ille lo faceva professionalmente, pro moneta!
A 'Georgia Tech' (le nomine breve popular del Instituto Georgia
del Technologia) io ha inseniate le statistica, le factor
analyse, le psychometrica, le statistica multivariabile,
le modellos de equationes structural, le theorias del
personalitate. In effecto post reciper mi Ph.D. io ha
cambiate campos de specialization al statistica post un
studio post-doctoral al Universitate de Nord Carolina a
Chapel Hill.
Nostre Schola de Psychologia a 'Georgia Tech' produce
Ph.D.'s in le psychologia cognitive del inveteremento,
del psychologia del ingeniera, e le psychologia industrial
e organizational. Le campo del 'universitate' de Georgia
Tech es in le centro de Atlanta, literalmente in le
umbra del edificio del centro administrative mundial de
Coca-Cola. Il ha circa 12.000 studentes, circa 60% de que
es studentes prebaccalaureate, e le resto es post-baccalaureate.
Le campo esseva le sito del Village Olympic durante le
Jocos Olympic de 1996.
Salute!
Stan Mulaik
|
