******************************************
Amselfeld - Kosovo Polje - Campo de Merlas
1389 - 1448 - 1915
******************************************
Quando le media hodierne parla de significantia historic
e symbolic de Kosovo Polje al populo serbe --
:: le serbos ha celebrate le die del prime grande
:: battalia de Kosovo, in 1389, como su die
:: national - il non es multo usual que un nation
:: celebra como su die national un catastropho major in
:: su historia ...)
-- on oblida o es ignorante super le secunde grande
battalia - e catastropho - que occurreva illac in 1448.
Sed le serbos memora Kosovo Polje pro ancora un battalia
grande, que era luctate in 1915, durante le prime guerra
mundial.
Io cita le libro "Maailmansodan historia" (Historia del
guerra mundial) per J.O. Hannula. Helsinki 1938.
:: Colonnello-tenente J.O. Hannula era considerate ante
:: le secunde guerra mundial como le plus remarcabile
:: historico militar de Finlandia. Infortunamente ille
:: moriva in 1944 como un commandante de un brigada per
:: un attacco de aviones sovietic quando le brigada era
:: in processo de esser cargate in trainos pro
:: transporto al Isthmo de Carelia ubi le armea sovietic
:: habeva le 1944-06-09 comenciate un offensiva
:: gigantesc, que duceva a un situation quasi
:: catastrophic del armea finlandese.
HANNULA:
"Le serbos habeva in 1914 brilliantemente repulsate tote
le attaccos de fortias de Austria-Hungaria. Le truppas de
General ("Feldzeugmeister") Potiorek habeva suffrite
perditas pesate e perdite quasi 230 000 soldatos, 40 000
de quales como prisionieros. Le perditas de serbos era
solmente un medie de perditas de austrianos. In ultra
Potiorek era fortiate al medie del decembre 1914
abandonar tote le territorio serb, i.a. Belgrad.
A causea de iste infortunas Potiorek era dimisse ex
le commandatura del fronte serb e in loco de illo veniva
provisorimente le archiduce Eugen. In Wien e
specialmente in Budapest le situation del fronte serb
era considerate como multo periculose; on timeva que le
ardente serbos vaderea attaccar per le frontiera."
Pro le potentias central (Germania e Austria-Hungaria,
desde 1914-11-05 Turchia e 1915-10-14 Bulgaria) il era
multissimo importante a aperir le connexion a Turchia
ubi le truppas de Entente, qui habeva invase le
isthmo de Gallipoli (Celiboilu), menaciava Istanbul.
Le 1915-10-05 comenciava le grande offensiva del truppas
de armeas del potentias central, 80 000 germanos (le 11e
armea sub general v. Gallwitz), 120 000 austrianos (le
3e armea sub general Kövess von Kövessháza - un
hungaro?) e 160 000 bulgaros (1e armea sub general
Bogadev e 2e armea sub general Todorov), in toto 360 000
soldatos, le german Generalfeldmarschall von Mackensen
como commandante supreme, contra 250 000 serbos sub
vojevod Radomir Putnik.
- - -
HANNULA:
"Le situation de serbos deveniva die de die plus e plus
desperate. Vehiculos, mesmo cannones debeva esser
abandonate preter le cammino, ammunition de artilleria
como assi alimentos comenciava cessar, il habeva panes
solmente pro 14 dies e on habeva reducte le protiones
con medietate. Le brave armea serb retirava se trans
montanias nivose e le inimico qui persequeva con grande
difficultates poteva observar que le signos del
disintegration del armea serb accresceva cata die. Armas
e varie material habeva essite jectate preter le
cammino e le numero de prisionieros accresceva
continualmente.
Le armea serb appareva jam esser stampate per
perdita. Le restos sue flueva a Prishtina e al sud-west
de illo, al famose Plano de Amsel alias Campo de Kossovo
(alias Campo de Merlas - Allan K.), al qual turcos,
serbos e magyaros habeva battaliate jam ante cinque
centos annos.
Al iste campo de battalia historic le serbos
essayava ancora un vice offerer resistantia. Le battalia
comenciava le 1915-11-19. Le 1e armea bulgare se
avantiava ex le est quando le 2e armea attaccava ex le
direction sud-est. Putnik jectava quasi tote le su
fortias restante contra le bulgaros e ille poteva
bastante efficientemente retardar iste inimico usque a
21 de novembre, usque quando duo divisiones german
appareva ex le nord al flanco e detra de serbos.
Isto causava le solution final. Putnik debeva
commandar del retiro general al west, via Montenegro
e Albania del nord al costa del Mar Adriatic. Le major
parte del artilleria e traino debeva esser abandonate,
solmente le artilleria de montania poteva accompaniar
le truppas in le terreno montuose difficile de fortiar.
Le alimentos, le quales on habeva solmente pro cinque
dies, era distribuite a truppas al comencio del marcha.
Fame, frigor, maladias e desperation escortava le
armea serb durante su marcha verso verso le mar que
era detra le distantia de quasi 200 kilometros. Le
vetule, malade rege era con le truppas, como etiam
Aleksander, le prince regal e le ambassador de Russia
in Belgrad. Putnik, le vetule supreme commandanter, era
seriemente malade; como le proprie commandante del
retiramento ageva le chef del stato major colonnello
Pavlovic. Le fortias de potentias central non
startava persequer trans le montania un inimico que
habeva suffrite un defaite decisive.
Thomson, un major sanitari francese scribeva:
'Le armea serb, que io ha viste tanto brave, coragiose
e sperantiose - parada de phantasmas silente e
mortalmente pallide.'
Al initio del decembre de 1915 ca. 140 000 viros
attingeva le costa del Mar Adriatic; totevia de illes
al minus 50 000 era recrutas non-trainate. Despecto tote
le difficultates on habeva succedite de transportar 95
cannones e ca. 20 000 prisioneros! Le armea serb, le
fortia del qual habeva essite in septembre 1915 420 000,
habeva perdite usque al fin del anno 94 000 soldatos
morte e ferite e 174 000 como prisioneros e disparite,
268 000 in toto. Le truppas del fortias central habeva
capturate 800 pecias de artilleria. In despecto de
perditas le campania habeva essite honorabile a serbos.
'Le victor non pote esser sin pronunciar appreciation
al opponente victe', scribeva general von Kuhl,
historico militar german. 'Inspirate per patriotismo
ardente le serbos battaliava coragiosemente.'
Le corage e spirito de battalia unic de serbos es
manifestate de illo, que si tosto que illes habeva
attingite le costa del Mar Adriatic illes voleva a
Thessalonika (In Grecia, 'Solum' in serbo, ubi le
Entente habeva aperte un nove fronte). Mesmo post omne
suffrentias illes habeva solmente un pensata: a nove
battalias contra le inimico! Sed le alliatos pensava
que le armea serb besoniava reposo, supplementos e
reorganisation ante nove battalias e assi le serbos era
transportate al insula de Corfu (ubi Elisabet, la
imperatrice del inimico principal de serbos, le Imperio
de Austria-Hungaria, habeva un palatio. -- Allan K.).
Usque le 23e de februario 1916 133 000 serbos era
transportate a Corfu. Durante minus quam un anno le
armea serb era in condition de nove battalias.
'Con reguardo al brave parve nation de serbos, que
illes credeva haber occise, illo non es morte!',
scribeva in 1916 Thomson, mentionate in supra. Despecto
omne su suffrentias illo ha un vita e prospectos de
futur brillante. Vamos sperar que tosto, quando le cosa
de justitia ha victe, nos va vider como Serbia se
convalesce de su vulneres e attinge in le mundo le
position, que ille mere pro le corage e le fidelitate
que illo ha demonstrate a su alliatos.'" [*]
In januario 1916 le armea austrian conquereva
Montenegro, cuje artilleria habeva essite un menacia
intolerabile contra Kotor (Cattaro), un porto de guerra
importante pro le nave de guerra de Austria-Hungaria.
- - - - - - - - - - - - - - - - - - - - - - - - - - - -
[*] Le secunde guerra mundial era un nove catastropho
al nation serb e le coup de grâce era delivrate per
Slobodan Milosevic qui in su ultra-nationalismo
mal-calculava le reaction del mundo in Kosova (e in
Bosnia-Hercegovina). Vamos sperar que Serbia va trovar
un nove futuro como mebro del Union Europee.
Io era in Budapest durante le massacre de Srebrenica e
in Alanya, Turchia, quando le truppas de OTAN startava
su offensiva contra le armea serb in Kosova. In un
restaurante nos videva in television novas de
voluntarios turc battaliante pro le albaneses e carros
blindate turc que arrivava al fronte trans Bulgaria.
- - - - - - - - - - - - - - - - - - - - - - - - - - - -
Al fronte de Thessalonika le divisiones serb era le
componente major in le armea del Entente. Su opponente
era le armea bulgare - un altere armea bravissime,
reinfortiate per alicun unitates special del armea
german. Le idea del fronte de Thessalonika era illo de
Briand, ministro del justitia de Francia. Post le
guerra ille, como prime ministro, era le primus motor
del Union Paneuropee in Francia. Quando su collega in
Germania, Gustav Stresemann, era le chef del Union
Paneuropee in Germania, il pareva que un Europa unite
era possibile in le proxime futuro. Sed Stresemann
moriva e Briand era expulse ex su officio per le
populo francese (le franceses sabotava le idea del
Europa unite tunc quando hodie per su rejection del
Constitution Europee ...).
- - -
Salutante
Allan Kiviaho
======================================================
Pro disabonar te del lista, invia un message a
[log in to unmask] con le texto:
UNSUBSCRIBE INTERLNG
o visita le sito del lista:
http://maelstrom.stjohns.edu/archives/interlng.html
======================================================
Visita le sito official del Union Mundial pro
Interlingua:
http://www.interlingua.com/
======================================================
|
