Stanley Mulaik wrote:

> Io ha ascoltate le adresse de Presidente Bush le nocte passate.
> Il es mi impression que il non presentava multo nove. Su propositiones
> super le taxas me frappa como ridicule.  On pote comprender como il
> es possibilemente injuste que le dividendos de actiones ha duple taxation,
> mais le suggestion que le sol remedia pro isto es a remover le taxas
> super le reception del dividendos non es convincente.  Proque non
> dar le corporationes reductiones in lor taxas pro le dividendos pagate
> e taxar solmente le individuos qui recipe le dividendos?  Alora illo es
> equalmente juste.  (Nota que le taxas de receptas individual es plus
> alte que le taxas de corporationes).

Il sembla que le taxation de actiones es un tendentia international. On habeva
simile discussiones ci in Svedia. Io non es certe que le systema es identic, ma
io ha le impression que il occurre un conversion inter varie paises in le
question de como taxar. Secundo le expertos le stato taxa le cive individual
plus durmente que le interprisas.


> Io esseva surprendite per su recommendation de expender $15 milliardos
> pro adjuta in Africa pro combatter le said.  Isto es multo inusual pro
> alcuno qui vole adherer a un strategia politic que depende super le
> appoio del dextra christian fundamentalista del statos del sud. Lor
> attitudes verso le said es que illo es un maladia imponite super homines
> per Deo pro punir les pro lor promiscuitate.  E le facto que isto adjuta
> africanos es equalmente repugnante, io pensa, a illes. Il es troppo facile
> pro istes a equar africanos con le negros del Statos Unite. Io anticipa
> alcun resistentia in le rangos del dextra christian in le Partito Republican.

Le dextra christian es un cosa que io nunquam ha comprendite, mesmo si io non
pote dicer que io ha facite un grande effortio de comprender lo!

Il habeva movimento contra le aborto, ma io crede que le opinion in favor de
abortos, quando necessari, era tanto compacte que illes non ha ganiate multo in
Svedia.

Secundo mi proprie impression, de lo que io ha potite observar e ha audite,
multo poco feminas vermente face abortar se. Il es quasi un solution extreme,
que on usa si necesse. Remedios contraceptive es usate e propagate.

Il es - a me - amusante que le christianos dextre pensa del humano como ille
esserea in le optime del mundos e non como ille es in nostre realitate presente!



> Del altere latere io crede que isto es un bon idea.

Si. Le aids (que ego elige scriber, quia isto es le parola in le plus grande
numero de linguas) sembla esser le correspondentia al grande pestilentia in le
Europa del 14-e seculo. Post ille pestilentia sequeva anque un massa de guerras
e revoltas que sequeva ille epidemia.

Le resultatos del aids in Africa es horrende. Il ha tote partes del paises que
care population qui pote laborar. Infantes debe transprender le labor del
adultos qui non ha plus de fortia...


> Con respecto a Irak io ha sentimentos miscite.  Io non crede que il ha
> un periculo immediate de Saddam Hussein, mais eventualmente io crede que
> ille es un major menacia.  Su ideologia es basate super le admiration
> de Hitler, Stalin e Darius Magne. Io crede que ille realmente vole
> dominar le region circa Irak.

Le pictura que on recipe de ille es de un regente totalmente irrational. Esserea
interessante vider que occurrerea si le Nationes Unite cessava le boycottamento
de Irak e si le resto del mundo facilitava le vita al irakianos.

Io me recorda un oration que faceva Goebbels al publico alicubi in Germania in
1943. (?)  Io lo ha audite per le radio multe vices. Goebbels demanda le
population: "Esque vos vole le guerra total?" E tote le population responde per
le costumari slogans del nazis! Le question es si le irakianos non vive in un
sorta de syndrome de Stockholm.

>  E con le petroleo ille pote disveloppar
> un armea grande--si nos lassa le. E io crede que ille realmente vole
> attaccar le Statos Unite--si ille ha le armas de destruction massive
> pro facer lo. Le SUA al ora actual es le sol poter que le restringe.
> Io pote vider como le avisores de Bush pensa que Saddam es similar a
> Hitler in 1935.  Si le europeos habeva attaccate Germania ante que
> illo ha devenite troppo potente, illes poteva stoppar Hitler.  Io es
> certe que Saddam ancora ha le armas biologic e chimic.  Illos es multo
> facile de celar per laboratorios mobile.  Irak es un grande pais,
> e il ha solmente approximatemente 150 inspectores del Nationes Unite.
> E illes non ha aeroplanos de recognoscentia.

Le differentia es forsan que le pictura que le mundo circum Germania habeva de
Hitler e su populo era troppo sympatic. Touristas in Germania admirava le
politessa del juvenes, de omnes, multes era fascinate del disciplina e le ordine
del nazis, tanto como multissime estranieros non comprendeva le riscos con le
juvene Union Sovietic.


> Mais Bush non ha essite multo convincente. Nos va attendar al presentation
> de evidentia per Secretario del Stato Colin Powell iste septimana proxime.

Il es un situation satis stupende que un del membros del Nationes Unite ha
information le qual on non dona al UN, a fin que un pote haber evidentia que
Irak vermente ha celate armas. Lo logic esserea que le Statos Unite, si illos
_vermente_ sape que Irak cela qualcosa, que illos informava le Nationes Unite de
isto. "Nos va presentar provas in alcun septimanas", sembla in mi aures pauco
credibile. Proque non presentar los nunc e a Hans Blix, pro exemplo!

> Un major question ora levate in nostre jornales  e periodicos es
> qual planos ha le administration pro administrar e occupar Irak si
> illo ja supera aquelle pais?  Le ironia es que in le campania pro
> le Presidentia que George W. Bush diceva que nos non debe adherer
> a un politica del reconstruction de nationes, mais su politica es
> ora vermente aquelle.  E como un columnista del  New York Times diceva,
> Irak pote devenir un altere Yugoslavia con su conflictos interne.

Le risco es que toto fini como le involvimento del Statos Unite in Libano. Il
habera sempre personas qui es preste jectar bombas o viagiar per un camion plen
de dynamite...

Le Nationes Unite o le Statos Unite habera un carga de propaganda plenmente
gigantesc de persuader le massas, plus o minus inculte in le stratas del paises
arabe, secundo me.


In toto un multo interessante message que tu ha scribite.

Amicalmente

Kjell R