Si, io sape de Gunnar Myrdal.  Il face multe annos desde que io ha comprate
su Asian Drama: An Inquiry into the Poverty of Nations and
The Challenge of World Poverty. A World Anti-Poverty Program in
Outline in tres volumines. Le tres volumines veniva in un cassa
de carton. Io realmente non jammais ha legite le libros. Io ha
usate los como un bloco de porta (pro mantenir le porta aperte)
al porta in mi camera de familia (ubi nos telespectava le
television).  Eventualmente le angulos del cassa ha deteriorate
se, e io ha reimplaciate Myrdal con un encyclopedia del physica,
que esseva equalmente grande e pesante.

Il es interessante como le religionistas selectiona lo que illes
vole e ignora le resto in lor libros sacre.  Le section de
Leviticus que require que le communitate occide le homine qui
ha cubate se con un altere homine, equalmente require que le
adulteratores sia occidite - e le homine e le femina.  E de plus
illo require que on sacrifica agnos, oves e columbas pro
purifica le persona qui ha peccate.  Si multe prohibitiones hodie
pare innecesse, pote on selectionar ancora alcun de iste
prohibitiones e ignorar le resto?  A mi aviso le problema es
le litteralismo, que in un populo educate e intelligente de
hodie, es un forma del idolatria--le tractamento del finite
como sacre.

Le scientia ha revelate que nostre preferentias sexual es
le producto de complexe processos de nostre disveloppamento,
frequentemente prenatal e mesmo post nascentia, in que varie
hormones initia le crescimento de certe centros in le cerebro.
Iste centros plus tarde determina formas de nostre comportamento sexual. Con
respecto al homosexualitate, io pensa que il ha
non un sol forma de isto, mesmo in le mesme sexo--e a vices il
ha personas qui es hermaphrodites, resultante de influentias
del hormones del matre durante que le embryon disveloppa in
le utero. Un embryon con le chromosomas XY de un masculo,
pote reciper un excesso del estrogeno (le hormone feminin)
que supprime le disveloppamento del pene e causa le disveloppamento
de organos sexual feminin. Tal personas fin a recentemente
esseva frequentemente elevate como feminas, mais quando illes
deveni adultes, lor hormones mascule causa les haber preferentias
pro feminas e non mascules.  Alcun pueras produce in lor
corpores un excesso del testosterone, le hormone mascule,
que affice le disveloppamento de lor cerebros tal que illes
monstra preferentias pro le activitates mascule e mesmo un
preferentia sexual de feminas.  Istes es inusual casos del
disveloppamento, mais totevia il es natural.  Le Deo ama
tote su creation!

Kjell ha levate le question del typo de occupation post un
guerra con Irak.  Istos es questiones que nostre administration
non ha discutite multo con le publico.  Io suppone que in
retorno pro uso de bases in Turchia, nos debe appoiar le
position de Turchia contra le creation de un stato curdic.
In le sud de Irak le population es shiite, que es le  majoritate
del population de Iraq.  In le centro, circa Baghdad, il ha
le sunnis, qui ora domina le governamento per le Partito Baath.
Mais illes es un minoritate, ben que illes ha essite a un vice
multe educate e moderne in lor perspective.  Como a unir un
pais tanto divergente esserea un problema major.  Io pensa que
le europeos debe adjutar. Il esserea in lor favor facer lo.

Con respecto al Nationes Unite, io pensa que le administration
american ha un caso: le Nationes Unite ha facite certe accordos
e sanctiones super Irak, e illo debe exiger les per fortia. Como un
organization il va devenir irrelevante si illo non lo face.

Corea essera un altere problema, e nos debe comprender lo que
es le realitate aqui. Es isto un caso in que un tyranno pote
esser placate con certe favores?  Io  pensa que un major parte
del solution va esser le populo de Corea del Sud.  Al ora actual
illes pare convincite que illes pote negotiar con lor vicinos
e fratres al nord.  Mais si isto falle, alora que?

Stan Mulaik