In le bibliotheca public de Long Beach, California, io
ha trovate un curso de francese in cassettes que es
facilemente adaptabile a interlingua.

Io nunc travalia sur le conversion de iste curso a
interlingua.  Naturalmente, io va cambiar le dialogos
pro facer los minus francese e plus international.

Mi travalio va rapidemente, como mi travalio sur le
dictionario de interlingua facile.  (Thomas me dava le
parolas que comencia con p-, pro le quales io
formulava definitiones provisori in unes quatro dies.)

Io va preparar versiones de iste dialogo e in
interlingua e in anglese.  Post finir mi travalio, io
va inviar le duo versiones (con photocopias del texto
original francese) a Thomas Breinstrup.

Como io nunquam ha usate interlingua in le
conversation, il essera necesse que Thomas e le
scandinavos (le ver guardianos de interlingua) joca
con le dialogos pro dar a illos un aspecto
conversational natural.

(Naturalmente illes anque potera re-organisar iste
curso de ulle maniera que illes trovara utile, como io
faceva con le texto original in espaniol sur le
historia del seculo XX que nunc appare transformate al
fin del curso de "Interlingua in Interlingua".)

Mi parte del travalio sur iste projecto va esser multo
facile.  Io spera que on potera leger los (o partes de
illos) como un production dramatic durante le
conferentia in Bulgaria.

Postea, io spera que il habera interlinguistas
scandinave con unes ex le talentos de actores de radio
o television qui potera facer registrationes de iste
dialogos pro transmission trans le Rete in le formato
MP3 o altere formatos audio conveniente.

(Naturalmente, on poterea includer transcriptiones del
dialogos e commentarios structural simile a illos que
forma parte de mi curso in "Interlingua in
interlingua".)

Le technologia audio del Rete ha facite progressos
rapide, e tosto il devenira multo economic transmitter
le interlingua parlate trans le mundo, de un maniera
facilemente discarcabile como le textos de
"Interlingua in interlingua".

Avanti con interlingua!

__________________________________________________
Do you Yahoo!?
Yahoo! Platinum - Watch CBS' NCAA March Madness, live on your desktop!
http://platinum.yahoo.com