Io ha ascoltate le adresse de Presidente Bush le nocte passate.
Il es mi impression que il non presentava multo nove. Su propositiones
super le taxas me frappa como ridicule.  On pote comprender como il
es possibilemente injuste que le dividendos de actiones ha duple taxation,
mais le suggestion que le sol remedia pro isto es a remover le taxas
super le reception del dividendos non es convincente.  Proque non
dar le corporationes reductiones in lor taxas pro le dividendos pagate
e taxar solmente le individuos qui recipe le dividendos?  Alora illo es
equalmente juste.  (Nota que le taxas de receptas individual es plus
alte que le taxas de corporationes).

Io esseva surprendite per su recommendation de expender $15 milliardos
pro adjuta in Africa pro combatter le said.  Isto es multo inusual pro
alcuno qui vole adherer a un strategia politic que depende super le
appoio del dextra christian fundamentalista del statos del sud. Lor
attitudes verso le said es que illo es un maladia imponite super homines
per Deo pro punir les pro lor promiscuitate.  E le facto que isto adjuta
africanos es equalmente repugnante, io pensa, a illes. Il es troppo facile
pro istes a equar africanos con le negros del Statos Unite. Io anticipa
alcun resistentia in le rangos del dextra christian in le Partito Republican.

Del altere latere io crede que isto es un bon idea.

Con respecto a Irak io ha sentimentos miscite.  Io non crede que il ha
un periculo immediate de Saddam Hussein, mais eventualmente io crede que
ille es un major menacia.  Su ideologia es basate super le admiration
de Hitler, Stalin e Darius Magne. Io crede que ille realmente vole
dominar le region circa Irak.  E con le petroleo ille pote disveloppar
un armea grande--si nos lassa le. E io crede que ille realmente vole
attaccar le Statos Unite--si ille ha le armas de destruction massive
pro facer lo. Le SUA al ora actual es le sol poter que le restringe.
Io pote vider como le avisores de Bush pensa que Saddam es similar a
Hitler in 1935.  Si le europeos habeva attaccate Germania ante que
illo ha devenite troppo potente, illes poteva stoppar Hitler.  Io es
certe que Saddam ancora ha le armas biologic e chimic.  Illos es multo
facile de celar per laboratorios mobile.  Irak es un grande pais,
e il ha solmente approximatemente 150 inspectores del Nationes Unite.
E illes non ha aeroplanos de recognoscentia.

Mais Bush non ha essite multo convincente. Nos va attendar al presentation
de evidentia per Secretario del Stato Colin Powell iste septimana proxime.

Un major question ora levate in nostre jornales  e periodicos es
qual planos ha le administration pro administrar e occupar Irak si
illo ja supera aquelle pais?  Le ironia es que in le campania pro
le Presidentia que George W. Bush diceva que nos non debe adherer
a un politica del reconstruction de nationes, mais su politica es
ora vermente aquelle.  E como un columnista del  New York Times diceva,
Irak pote devenir un altere Yugoslavia con su conflictos interne.

Mi major disappunctamento es como le partitos politic ha devenite
tanto disciplinate que illes appoia qualcunque lor leaders dice.
Quando io esseva un juventute le spectro de opinion esseva plus
large in Washington.  Ora quando le Presidente ha un idea stupide,
tote le Republicanos appoia lo como si illo es doctrina sacre.
Necuno pensa creativemente pro solver le problemas. E tote problemas
es vidite per speculos que filtra le vista pro facer lo conformar
al preconceptiones del partito.

Salute amicos!


Stan Mulaik