Le discarga in massa del IED electronic de www.babylon.com continua. Cata
die il se distribue (per discarga o abonato) 846 nove exemplares in medie.
Le administrator del sito justo hodie ha actualisate le datos, de maniera
que on pote constatar le tendentia general:

Data / Discargatas / Abonatos / Total / Pro die (medie)
23-Aug-00 / 0 / 0 / 0
02-Nov-00 / 8301 / 12636 / 20937 / 295
23-Nov-00 / 12249 / 17669 / 29918 / 428
14-Dec-00 / 20737 / 26947 / 47684 / 846

Qual conclusiones on pote traher de isto?

(1) Il es bastante certe que isto constitue le distribution le plus grande
e rapide de materiales interlinguistic in le historia. Si, un
disveloppamento sin parallel, non in le historia de interlingua, non mesmo
in illo de esperanto. Benque le majoritate (probabilissimo: le vaste
majoritate) de discargantes non comprende lo que illes discarga, un certe
fraction de illes va interessar se in iste compilation de vocabulario
international. Il simila le conto de visitantes a www.interlingua.com: non
cata visitante deveni interessato, ma quanto plus de visitante, tanto plus
de nove interessatos. Il es a notar que (secun le tendentia actual) le
numero de discargantes de IED va superar tosto le numero total de
visitantes al sito UMI.

(2) Le IED electronic es primemente un utensile pro traducer parolas
individue de interlingua a anglese, durante que on lege un texto
electronic. Question: ubi es le textos pro nove interessatos a leger? Tales
existe, certo, debite al labores de multos durante le ultime 4-5 annos. Ma
esque on non exige multe textos de plus?

In breve, nos recipe un grande donato pro le comenciamento del nove
millennio. Que nos facera con illo?

Amicalmente

Chris Burd