-- Ha arrivate le momento -- ha dicite Dumbledore, surridente verso le mar
de facies levate. -- Le Torneo Trimago va comenciar. (...) Como vos totes
sape, tres campiones compete in le torneo (...), un pro cata schola. Illes
recipera notas pro lor execution de cata un del labores del torneo, e
aquelle qui habera obtenite le maxime resultato al fin del tertie labor
ganiara le Cuppa Trimago. Le campiones essera eligite per un judice
impartial... le Calice de Foco.

(...) Le mago (...) ha retirate un grande calice de ligno rusticamente
taliate. Illo haberea essite considerate totalmente commun si illo non
esserea plen usque al bordo con flammas blanc-azurate, que dava le
impression de danciar. (...)

-- Aquelle qui volera facer se candidato a campion debe scriber su nomine
e schola clarmente super un pecia de pergamena e depositar lo in le calice
-- ha dicite Dumbledore. -- (...) Deman nocte, Festa del Magas, le calice
retornara le nomine del tres personas que ille ha judicate le plus dignes
de representar lor scholas. (...)

(...)

Le flammas intra le Calice subito ha rubescite de nove. Illos ha
comenciate a liberar scintillas. In le momento sequente, un lingua de foco
se ha elevate in le aere, e ha expellite un fragmento de pergamena
legiermente aduste -- le salon integre ha tenite le respiration.

Dumbledore ha prendite le pergamena e lo ha tenite al distantia del
bracio, a fin de poter leger lo al lumine del flammas, que ha devenite
blanc-azurate de nove.

-- Le campion de Durmstrang -- ha legite ille in forte e bon sono --
essera Viktor Krum.

-- Grande surprisa! -- ha critate Ron, al mesme tempore que un tempesta de
applausos e vivas ha percurrite le salon. Harry ha vidite Viktor Krum
levar se del tabula de Slytherin e diriger se con dorsos curvate verso
Dumbledore; ille ha volvite al dextera, ha passate ante le tabula del
professores e ha disparite per le porta que conduceva al camera vicin.

(...) Le applausos e commentarios se ha extinguite. Tote le attentiones de
nove se ha concentrate super le Calice de Foco, que, secundas depost, de
nove se ha rubescite. Un secunde pecia de pergamena ha volate de intra
illo, lanceate per le flammas.

-- Le campion de Beauxbatons es Fleur Delacour!

(...) Quando Fleur Delacour ha equalmente disparite in le camera vicin,
totes de nove ha facite silentio. Mais iste vice ha essite un silentio
tanto pesante de excitation que uno quasi poteva sentir su gusto. Le
campion de Hogwarts es le proxime...

E le Calice de Foco ha rubescite plus un vice; scintillas ha effluite de
illo; le lingua de foco ha ascendite multo alto in le aere e de su puncta
Dumbledore ha retirate le tertie pecia de pergamena.

-- Le campion de Hogwarts -- ille ha annunciate -- es Cedric Diggory!

(...) Cata un del studiantes de Hufflepuff se ha ponite in pede, critante
e calcante, quando Cedric ha passate per illes, un enorme surriso al
facie, e se ha dirigite al camera post le tabula del professores. (...)

-- Excellente! -- ha exclamate Dumbledore felice, quando finalmente le
tumulto se ha serenate. -- Multo ben, ora nos ha nostre tres campiones. Io
es certe que io pote contar super totes, inclusive con le altere
studiantes de Beauxbatons e Durmstrang, pro offerer a nostre campiones
tote le appoio que vos potera. Per supportar vostre campiones, vos
contribuera de maniera multo effective...

Mais Dumbledore ha cessate parlar inexpectatemente, e ha devenite obvie a
totes lo que le habeva distrahite.

Le foco in le calice veniva de rubescer ancora un vice. Illo ha expellite
scintillas. Un longe flamma se ha elevate subitemente in le aere e ha
altiate plus un pecia de pergamena.

Con un gesto apparentemente automatic, Dumbledore ha extendite le mano e
ha prendite le pergamena. Ille lo ha elevate e su oculos se ha aperite
multo pro le nomine que ille ha vidite scribite. Il ha habite un longe
pausa, durante le qual le mago ha contemplate le pergamena in su manos e
totes in le salon ha fixate le reguardo super Dumbledore. Ille ha tussite
legiermente e ha legite...

-- Harry Potter!

~~~

J. K. Rowling, "Harry Potter and the Goblet of Fire" ("Harry Potter e le
Calice de Foco")

Traducite per Ensjo.
("Draco dormiens nunquam titillandus"!)

Interlingua-English Dictionary:
http://www.interlingua.com/ied/ied.php