Car amicos,

1. In mi message del 6 de martio io ha scribite que on trova in le
iintroduction del IED le regulas pro le formation de nove parolas. Il
haberea essite plus correcte si io habeva scribite que on  trova iste
regulas super toto in le "Interlingua Grammar", in le parte que tracta le
affixos. Le introduction del IED tracta in prime loco le methodos pro
REGISTRAR parolas existente in le linguas fonte de interlingua. Le
application de iste methodos e technicas me ha procurate un lista (stockate
super le disco dur de mi computator) de 20350 parolas que non es
incorporate in le IED. Mi lista cresce cata die.

Il ha in mi lista anque parolas que io non ha REGISTRATE, proque illos non
es trovabile in le multe dictionarios que io possede. Io vos da un exemplo
que io ha introducite ante un medie hora. Le IED presenta le verbo
METHODISAR. Il es clar que il debe exister un substantivo derivate de iste
verbo. Ma io non  trova un tal substantivo in mi dictionarios. Tamen io non
ha hesitate de introducer le substantivo METHODISATION, que ha un senso
derivate del verbo.

Io ha integrate in mi dictionarios tote le nove parolas registrate, que io
ha accompaniate, si possibile e utile, de exemplos de lor uso in
expressiones e phrases.

2. Il ha inter vos alcuno qui suggere que in mi message de lunedi io ha
volite ridiculisar le ideas relative al creation de un "Academia". Forsan
anque alteres inter vos poterea haber le mesme sentimento. Ma io vos
declara hic que isto non esseva e non es mi intention. Io ha volite
solmente exprimer mi opinion personal: le fundation de un tal club (con
votationes) me pare completemente inutile e anque contrari al spirito
liberal in nostre rangos.

Salutes amical de Piet




http://www.homepages.hetnet.nl/~interlingua/frame/index.htm