Car amicos,

Le jornales de april scribe que recentemente duo gruppos de astronomos
ha trovate forte indicationes que monstra in le Galaxia le existentia de
un systema solar incognite. Il se age hic de tres planetas gasose del typo
Jupiter que face lor orbita circum Ypsilon Andromeda, un stella multo
luminose in le Nebulosa de Andromeda a un distantia de 44 annos-lumine
del terra.

Independentemente le duo equipas de recerca ha discoperite le
exoplanetas. Nunc le astronomos crede que il es probabile que un multo
grande numero del 200 milliardos de stellas in nostre Galaxia dispone
de un systema de planetas.

In le curso del annos passate on ha observate vinti planetas foris de
nostre systema solar. Illos trai lor existentia per parve deviationes
in le orbita del stella al qual illos pertine, lo que es causate per le
gravitation. In iste casos il se ha agite sempre de un sol planeta.
Ma ora on ha trovate un trio.

Jam in le anno 1996 on ha registrate le planeta interior de iste trio.
Illo ha le massa de Jupiter e face su tornos a curte distantia de
Ypsilon Andromeda in solmente 4,6 dies. Le duo planetas novemente
discoperite que se displacia in orbitas oval, ha un peso de duo o
quatro vices le peso de Jupiter. Un de illos ha un distantia a Ypsilon
Andromeda comparabile al distantia de Venus a nostre sol.
Le altere circula in un orbita que es le duple de illo de nostre terra.
Le periodos de revolution de ambe exoplanetas es 242 dies e inter
3« e 4 annos.

Le surprisa del discoperta del trio de exoplanetas es que le theorias que
le astronomos ha super le formation de planetas, non pote explicar lor
existentia. Iste theorias dice que enorme bollas gasose como Jupiter
pote exister solmente a grande distantia del stella matre. Totevia le tres
planetas circum Ypsilon Andromeda se trova in un zona al interior del
limite indicate per le theoria.

Secundo le opinion de un del astronomos il es multo probabile que le
tres planetas ha entrate in collision inter se, lo que ha causate lor actual
position interior. E ille non exclude le possibilitate que anque planetas
con un crusta dur como nostre terra pertine al systema trovate.
Ma le massas de iste planetas es troppo parve pro poter esser
registrate con le instrumentos actual.

Salutes amical de Piet