FEMINA, SU ORIGINE E SU FIN
(Luiz Fernando Veríssimo, traducite per Ensjo.)
Existe varie legendas super le origine del Femina. Un dice que Deo ha
facite le prime homine dormir, inaugurante assi le anesthesia general, ha
extrahite un de su costas e con illo ha facite le prime femina. E que le
prime probation de Eva ha essite attender Adam e supportar su mal humor
durante que ille convalesceva del operation.
Un variante de iste legenda dice que Deo, con su termino pro le Creation
exhaurite, ha facite le homine in haste, pensante "Depost io lo meliora",
e plus tarde, con tempore, ille ha facite un homine plus ben elaborate,
que ille ha appellate Femina, que es "melior" in aramaico.
Altere legenda dice que Deo ha facite le femina primo, e se ha effortiate
in su formas, e ha taliate aqui e ha extrahite de la, e con lo que ha
restate ille ha facite le homine solo pro non jectar argilla foras.
Zeus haberea evellite le femina de su proprie capite.
Alcun populos nordic cultiva le mytho del Grande Ursa Olga, origine de
tote le feminas del mundo, lo que explica le facto que le feminas se
inrola periodicamente in pellos de animales, cedente a un incontrolabile
impulso atavic, mesmo que il sia solo pro experimentar, in le boteca, e
depost quasi suffrer un syncope a causa del precio.
In certe tribos nomade del Medie Oriente uno ancora crede que le femina ha
essite originalmente un camelo que, in le anxia de servir su maestro de
tote le manieras, se ha transformate gradualmente usque a acquirer su
forma actual. In le Extreme Oriente existe le legenda que le feminas cade
del celo, ja in kimono. E in certe partes del Occidente persiste le
credentia que le femina se compra del classificatos, essente possibile
selectionar etate, color del pelle e typo de massage.
Tote iste legendas, claro, ha pauc relation con le veritate scientific.
Hodie uno sape que le Homine es producto de un processo evolutive que ha
comenciate con le prime ameba a exir del mar primordial, e ille es le
descendente directe de un linea specific de primates, habente passate per
varie phases usque a attinger su stadio actual -- e alora incontrar le
Femina, que necuno sape ancora de ubi ha venite.
Es certemente ridicule pensar que le feminas equalmente descende de
simias. Le mie matre, no!
Un del theses le plus acceptabile super le rolo del femina in le evolution
del homine es que le prime incontro inter le duo ha occurrite in le
periodo paleolithic, quando un Homo sapiens (ma non troppo), appellate,
possibilemente, Ugh, ha exite pro caciar e ha vidite, sedite super un
petra e pectinante le capillos, un esser que le ha provocate le sequente
pensata, in linguage de hodie: "Isto, si, es un Femina, e non aquello que
io ha in mi caverna". Ugh se ha approximate al femina e, in aquelle su
modo peculiar, faceva intender que ille voleva procrear con illa. "Agh
maakgrom grom", o cosa similar. Le femina le ha reguardate de alto a basso
e ha comenciate a rider.
Es necessari rememorar que Ugh, ben que ille habeva un bon apparentia
secundo le standards del epocha, era pauco plus que un animal al oculos
del femina. Ille habeva le fronte stricte e le mandibulas pronunciate e
usava grassia de mammut in su capillos. Le femina ha dicite alcun cosa
como "Tu non te reguarda al speculo?" e se ha distantiate, repugnate,
lassante Ugh desolate. Ante que illa dispareva completemente, Ugh ancora
ha critate "Attende alcun 10 mille annos e tu va vider!", e retornante al
caverna ille ha exhortate su companiones a perfectionar le processo
evolutive.
Desde alora, le objectivo del evolution del homine ha essite proportionar
un par adequate pro le femina, a fin que, vidente le copula, necuno
poterea dicer que illa solo exiva con ille pro le moneta, o pro espaventar
assalitores.
Sin aquelle incontro fortuite in alcun plana del mundo primitivo, le
homine ancora serea le mesme troglodyte negligente e sin ambition,
interessate solmente in caciar e expedicular se, e un fallimento social.
Mais de ubi ha venite le prime femina, considerante que nos pote discartar
tanto le evolution quanto le phantasias religiose e mythologic super le
creation? Io me inclina al these del origine extraterren. Le femina
venirea (isto es pur speculation, claro) de altere planeta. Io las observa
durante annos -- inclusive io me ha sposate con una, pro poter studiar las
plus proximemente -- e io judica haber collectionate provas irrefutabile
que illas non es de iste mundo.
Io ha observate que illas non ha le mesme instinctos que nos, e
eventualmente illas es surprendite in divagationes, como si captante
ordines de altere galaxia, ben que illas disguisa e dice que illas solo
pensava al cena. Illas ha un logica completemente differente del nostre.
Ultimemente illas ha tentate dissimular lor peculiaritate, assumente
attitudes masculin e faciente cosas -- como diriger grande interprisas e
blasphemar contra le matre del automobilista al latere -- impensabile
alcun annos retro, lo que solo augmenta le suspicion que se tracta de un
strategia pro camouflar nostre differentias, que comenciava a devenir
evidente.
Quando nos commenta le facto, illas nos accusa de esser machistas,
prendite a prejudicios e incapace de recognoscer lor derectos, o
alteremente illas frictiona nostre nuca con le naso, dicente cosas como
"ioink, ioink" que nos lassa horripilate e sin argumentos.
Clarmente illas ha concertate isto. Illas sempre concerta manieras nove de
impedir que uno discoperi que illas es alienigenas e ha projectos proprie
pro nostre terra. Es lo que illas face quando illas va, totes insimul, al
toilette, sapiente que nos non pote ir la pro audir. Multe vices, mesmo in
nostre presentia, illas parla in un linguage incomprensibile que solo
illas intende, obviemente un codice pro transmitter instructiones del
Planeta Matre.
E illas ha lor colpos basse. Lor artificios coarde. Lor oculos a laser,
clar o profundemente obscur, lor buccas. Mi Deo, alcunas ha mesmo
lentigines super le naso. Lor sinos, aquelle missiles intelligente.
Aquelle curva suave del coxa quando arriva al anca, e le Convention de
Geneva non lo vide! E le armas chimic -- perfumos, lotiones, cremas. Illas
es de un civilization superior. Que pote nostre bastones contra lor armeas
de incantamentos?
Tosto illas dominara le mundo. Tosto nos sapera lo que illas vole.
E si post le publication de iste articulo io sera trovate morte con
indicios de haber essite teneremente asphyxiate, con un surriso, mi these
es correcte. Si nihil evenira a me, es indicio que le these es correcte,
mais illas non time plus le dismascamento.
Que vole illas, al fin? Si le femina realmente ha venite al mundo pro
inspirar le homine a meliorar e esser digne de illa, illa pote haber
arrivate al conclusion que illa ha fallite, que iste vetule guerrero non
se conformara jammais.
Nos continuara a esser feminas con defecto, un experientia minor in un
planeta inferior. Lo que suggere le possibilitate que, assi como illa ha
venite, le femina es preste a partir, disillusionate de nos. E si es isto
que illas conspira in le toilettes? Le retiramento? Nos serea abandonate a
nostre proprie stupiditate. Illas portarea lor filias e nos lassarea con
facies de Ugh.
Io pote vider le fin de nostre specie. Nostre meliores scientistas
abandonante toto e dedicante se a interminabile tests con le costa, post
haber desistite del femina synthetic. Tentante recrear le magica del
creation. Un femina, qualcunque femina, de qualcunque maniera. Nos
promitte que iste vice nos non las disappunctara.
Un femina! Como es que se face un femina?
~~~
Ensjo.
|