http://www1.europarl.eu.int/dg3/sdp/tribeur/es/es9905t3.htm
(Original in espaniol)

LE OFFICIO PRO LE LUCTA ANTI-FRAUDE COMENCIA A FUNCTIONAR IN JUNIO
Le nove OLAF potera realizar investigationes in tote le institutiones
communitari e in le Statos Membros super casos de fraude o corruption que va in
detrimento del budget communitari. Illo essera in le sino del Commission ma
fruera de plen independentia operative.

Le plenario ha date luce verde al creation de un officio de lucta contra le
fraude, le corruption e tote activitate illegal que attenta contra le interesses
financiari del Union Europee e consequentemente contra le interesses del
contribuente. Usque ora le investigation de supposite casos de fraude esseva
realizate per un unitate del Commission Europee, le UCLAF, que contava con pauc
medios. In ultra, le Parlamento estimava que esseva necessari reinfortiar su
independentia. Post negociationes inter le tres institutiones -- Commission,
Parlamento e Consilio -- on ha arrivate a un accordo. Le nove officio -- OLAF --
essera in le sino del Commission pro non comenciar totalmente del zero. Ma illo
fruera de plen independentia. Illo potera realizar investigationes "externe",
illo es, in le Statos Membros, e "interne", in tote le institutiones, organos e
organismos communitari. Le OLAF se constituera le 1me de junio e essera
operative immediatemente. E totes es de accordo que illo debe contar con plus
personal que le UCLAF. Le investigationes potera comenciar per decision del
director per initiativa proprie, per petition del Stato Membro interessate o, in
caso de investigation in un institution communitari, per sollicitation del
institution affectate. Le Officio debera communicar al autoritates judicial
competente le resultatos del investigationes quando il habera implicationes
penal. Illo essera submittite al controlo de un committée de vigilantia
componite per cinque membros independente.

---
Ensjo.