Ab EP News (Irlanda):
http://www1.europarl.eu.int/dg3/sdp/tribeur/irl/ir0599t1.htm

REFUGIATOS KOSOVAR -- LE UE DEBE FACER PLUS

Le preoccupationes humanitari esseva al vanguarda iste mense in Strasbourg
quando le parlamentarios demandava que le adjuta de emergentia al Balkanes sia
intensificate pro tractar le crise crescente in Kosovo. Le presidente del
Consilio, Le prime ministro german Joschka Fischer, ha pingite un quadro sever
del situation in le region ubi il habeva un total de 850.000 personas
disallogiate. Alcunes de iste individuos esseva ancora in Kosovo ubi illes
habeva manco de supplimentos adequate de alimentos e medicamentos, e contemplava
le menacia constante de attaccos del armea serbe.

Circa 650.000 habeva fugite a paises vicin que non habeva le infrastructura
necessari pro allogiar les e cuje ressources ha essite distendite ultra lor
limites. Sr. Fischer advertiva in particular quanto al instabilitate crescente
in Macedonia ubi le delicate equilibrio ethnic esseva disturbate per le influxo
in massa de refugiatos.

Division inequal de onere?

Le [acting] commissario Hans van den Broek respondeva con un promissa de action
immediate. Ma, insimul con adjuta terrestre, le parlamentarios ha incitate le
Statos Membros a admitter plus refugiatos como un "mesura exceptional e
temporari". Actualmente le carga de admitter refugiatos non ha essite dividite
equalmente inter le Statos Membros.

Germania ja ha acceptate plus que 10.000 individuos e se ha offerite a acceptar
al minus plus 10.000.

Le governamento brittanic ha essite criticate le mense passate pro non assumer
su responsabilitates in iste area, ma recentemente illo ha promittite admitter
un quota major.

Irlanda ha recentemente accordate in admitter al minus 1.000 refugiatos, le
prime gruppo del quales arrivava iste septimana.

Manco de politicas commun

Un del problemas in iste situation, diceva le [acting] commissaria Emma Bonino,
esseva que cata Stato Membro ageva unilateralmente e non informante le alteres
super lor planos -- consequentemente il habeva multe duplication de effortios.
Un altere area de difficultate esseva que le Statos Membros interpreta le stato
legal del refugiatos kosovar in manieras differente.

In alcun paises, como le Regno Unite, illes ha le derecto de travaliar, durante
que in alcun alteres illes non lo ha, e illes es mantenite in un situation de
dependentia. Il ja ha habite tentativas del Parlamento Europee pro disveloppar
un strategia commun pro le refugiatos que superarea alcunes de iste problemas, e
le Tractato de Amsterdam pote provider un opportunitate de major harmonization
de leges e politicas. Totevia, multes senti que le desiro politic de abbordar le
problema ha mancate usque ora.

Nonobstante, isto non es un affaire ubi il pote haber plus mora. Multes del
refugiatos non superviverea a un hiberno in lor inadequate allogiamentos actual.

---
Ensjo.